> ՀԱՐՑԱԶՐՈՒՅՑՆԵՐ, ՀՈԴՎԱԾՆԵՐ > ԵԹԵ ԵՐԿԽՈՍՈՒԹՅԱՆ ԳՈՐԾԸՆԹԱՑԸ ԼԻՆԻ ԱՆԱՐԴՅՈՒՆԱՎԵՏ, ՏԵՂԻ ԿՈՒՆԵՆԱ ՋՐԲԱԺԱՆ

ԵԹԵ ԵՐԿԽՈՍՈՒԹՅԱՆ ԳՈՐԾԸՆԹԱՑԸ ԼԻՆԻ ԱՆԱՐԴՅՈՒՆԱՎԵՏ, ՏԵՂԻ ԿՈՒՆԵՆԱ ՋՐԲԱԺԱՆ

«Ես չեմ հավատում, որ ՀԱԿ-ի գործողություններին իսկապես ծանոթ մեկը կարող է իրականում հավատալ, որ ՀԱԿ-ը կարող է գնալ ինչ-որ գործարքների»,¬ ասում է Նիկոլ Փաշինյանը։

«Ես չեմ հավատում, որ ՀԱԿ-ի գործողություններին իսկապես ծանոթ մեկը կարող է իրականում հավատալ, որ ՀԱԿ-ը կարող է գնալ ինչ-որ գործարքների»,¬ ասում է Նիկոլ Փաշինյանը։

ՀԱԿ-ի վերջին հանրահավաքից հետո տարբեր տեսակետներ ու մեկնաբանություններ են հնչում ՀԱԿ-ի առաջնորդի արտահայտած կարծիքների և իշխանությանը հղած ուղերձների վերաբերյալ։ Ի՞նչ ձևաչափով կարող է ընթանալ իշխանություն-ՀԱԿ հետագա երկխոսությունը, և ինչպիսի ակնկալիքներ ունի, մասնավորապես, այդ հարցում ՀԱԿ-ը։ Այս հարցերի շուրջ «Կապիտալը» զրուցել է ՀԱԿ-ի անդամ, «Հայկական ժամանակ» օրաթերթի գլխավոր խմբագիր Նիկոլ Փաշինյանի հետ։

-Հասարակության մեջ կա տեսակետ, որ համաժողովրդական շարժումը Լևոն Տեր-Պետրոսյանի փոխարեն շուտով առաջնորդելու եք Դուք: Ըստ Ձեզ` որքան հիմնավոր են այս խոսակցությունները:

-Կարծում եմ` տեսանելի ապագայում ՀԱԿ-ը չի կարող ունենալ այլ առաջնորդ՝ բացի Լևոն Տեր-Պետրոսյանից: Ես ինձ համարում եմ Տեր-Պետրոսյանի թիմի անդամ, Տեր-Պետրոսյանի հետևորդ և կարծում եմ, որ ՀԱԿ-ի գործունեության հաջողությունները մեծապես պայմանավորված են այն փաստով, որ այդ կառույցի ղեկավարը հենց Լևոն Տեր-Պետրոսյանն է: Ժամանակակից պատմության մեջ հնարավոր չէ գտնել որևէ այլ դեպք, երբ 2008թ. մարտի 1-ի նման հարված ստացած որևէ քաղաքական ուժ կարողանար ոչ միայն գոյատևել, այլև դառնալ երկրի թիվ մեկ ընդդիմությունը և իշխանության միակ իրական այլընտրանքը: ՀԱԿ-ը դա արեց, և սա իսկապես մեծ հաջողություն է, և կարծում եմ, որ այդ հաջողությունը մեծապես պայմանավորված է Լևոն Տեր-Պետրոսյանի ոչ թե զուտ անձի, այլ նրա մոտեցումների, ընկալումների, լայնախոհության գործոններով, քաղաքական իրավիճակը և քաղաքական նրբությունները հասկանալու նրա բացառիկ ընդունակությամբ: Ես կարծում եմ` Լևոն Տեր-Պետրոսյանը շատ երկար կլինի Կոնգրեսի առաջնորդ, և Կոնգրեսի առաջնորդության թեման տեսանելի ապագայում հրատապություն չունի: Ինչ վերաբերում է ինձ, իմ քաղաքական գործունեության հիմքում դրված է հետևալ սկզբունքը. առաջինը լինելու մոլուցքը փոխարինել վերջինը լինելու պատրաստակամությամբ: Ես հավատարիմ եմ այս գաղափարին և պատրաստ եմ լինել Հայ ազգային կոնգրեսի ամենահետին անդամը:

-Հանրահավաքի ժամանակ Տեր-Պետրոսյանը խոսեց ՀԱԿ-ի անփոփոխ ռազմավարությունից, մինչդեռ ՀԱԿ-ը իր ռազմավարությունն այս երեք տարիների ընթացքում հասցրեց մի քանի անգամ փոխել: Ինչպե՞ս եք սրան վերաբերվում:

-Լևոն Տեր-Պետրոսյանը երեկ իր ելույթում շատ հստակ անդրադարձավ քրեաօլիգարխիկ-ավազակապետական համակարգը կազմաքանդելու անհրաժեշտությանը, և ես չեմ ընդունում, որ ինչ-որ բան է փոխվել մեր ռազմավարության մեջ: Մարդկության պատմության մեջ, լինի դա քաղաքական կամ ոչ քաղաքական, բոլոր սուր, հակասությունների տեղիք տվող հարցերը բանակցվում են, և չկա մի հարց, որը հնարավոր չլինի դարձնել բանակցության թեմա: Հենց բանակցությունների իմաստն էլ այն է, որ բանակցվում է այն դեպքում, երբ գոյություն ունի սուր հարց, սուր հակասություն: Եթե մենք այս իշխանությունների հեռացման և կազմաքանդման խնդիր չդնեինք, էլ ինչի շուրջ պիտի բանակցեինք: Եթե չլիներ սուր հակասություն, չէր լինի նաև բանակցությունների կարիք, իսկ մեր բանակցությունների նպատակը մեկն է. հասնել արտահերթ նախագահական և խորհրդարանական ընտրությունների անցկացմանը Հայաստանում:

-2007թ. Շարժումը ձևավորվեց ոչ թե իշխանությունների հետ բանակցելու, այլ այն կազմաքանդելու և իշխանափոխություն իրականացնելու համար:

-Կրկնում եմ` իշխանության հետ երկխոսելու մեր նպատակն ու իմաստը հենց իշխանական քրեաօլիգարխիկ բուրգը կազմաքանդելն է և իշխանափոխություն իրականացնելը: Հիմա հնարավորություն կա դա անել անցնցում եղանակով, և կարծում եմ՝ այդ հնարավորությունից պետք է օգտվել:

-Իշխանության հետ բանակցում եք՝ իշխանությանը հեռացնելու համա՞ր:

-Այո, իսկ ինչու ոչ:

-Կարծում եք, որ այդ բանակցությունները կտա՞ն որոշակի դրական արդյունք:

-Մենք ամեն բան կանենք, որ բանակցությունները տան արդյունք, եթե չտան ցանակալի արդյունք, կլինի ջրբաժան: Սա է ողջ խնդիրը: Ինչ վերաբերում է, թե ինչու է պետք բանակցություններ սկսել, պատասխանը պարզ է. իշխանությունները վերջին շրջանում իրենց գործողություններով ցույց տվեցին, որ կարողանում են քաղաքական իրավիճակն իրատեսորեն գնահատել և գնալ զիջումների: Այն, որ Դուք այսօր ինձ հետ հարցազրույց եք վարում, հենց այդպիսի զիջման արդյունքն է: Մեր համախոհները շատ երկար ժամանակ իշխանություններից պահանջում էին ազատ արձակել քաղբանտարկյալներին: Ասում էին նաև, որ եթե բանտի դռները չբացվեն ներսից, ապա դրանք կբացվեն դրսից: Հիմա ոմանք կարող են ասել, թե ինչու ընդդիմությունը սպասեց այսքան երկար, թող վեց ամիս առաջ գնային, բանտի դռները ջարդեին և ազատ արձակեին իրենց համախոհներին: Կարծում եմ, որ եթե որևէ բանական մարդու առջև դրվում է ընտրություն, ըստ որի՝ միևնույն հարցը հնարավոր է լուծել անցնցում կամ ցնցումների ճանապարհով, ապա բանական մարդը կընտրի անցնցում ճանապարհը: Մեր խնդիրները չեն փոխվել և չեն փոխվելու. դրանք լուծվելու են, իսկ թե ինչ ճանապարհով, ցույց կտա ժամանակը: Կարծում եմ` իշխանությունների վերջին տարիների փառահեղ տապալումը նրանց կհուշի, որ իրենց էլ ձեռնտու է անցնցում ճանապարհը:

-Իշխանությունները տարբեր մակարդակներով նշել են, որ իրենց օրակարգում չկա և չի կարող լինել արտահերթ ընտրություններ կազմակերպելու հարցը:

-Իշխանությունը պնդում էր, որ Հայաստանում չկան քաղբանտարկյալներ, սակայն մեզ ազատեցին որպես քաղբանտարկյալների: Իմ ազատությունից առաջ տասնյակ հրապարակումներ են եղել, որոնց հեղինակներն ասել են, որ չեն հավատում, թե ինձ բաց կթողնեն, հիմա այդ նույն հրապարակումների հեղինակներն ասում են, որ չեն հավատում, որ տեղի կունենան իշխանափոխություն և արտահերթ ընտրություններ: Եթե երկխոսության գործընթացը լինի անարդյունավետ, տեղի կունենա ջրբաժան:

-Այսինքն` ցնցումնե՞ր:

-Կարծում եմ` երկխոսության ճանապարհը նաև նրա համար է, որ արտահերթ նախագահական և խորհրդարանական ընտրություններ իրականացնելու պահանջի շուրջ համախմբվի քաղաքացիների մի այնպիսի ամբողջություն, որ ցնցումների հավանականությունն ի չիք կդառնա նաև ջրբաժանի պարագայում: Իմիջիայլոց ասեմ, որ մարտմեկյան իրադարձություններից հետո Հայաստանում նման իրադարձությունների կրկնությունը բացառվում է և բացառվում է հենց այն պատճառով, որ իշխանություններն առ այսօր չեն կարողացել մարսել 2008թ. մարտի 1-ը: Նման փորձի կրկնությունը իշխանությունների համար կարող է ունենալ աղետալի հետևանքներ:

-Հասարակության մի մասն այսօր ՀԱԿ-ին մեղադրում է իշխանությունների հետ գործարքի գնալու համար: Ձեր դիտարկումը:

-Մենք պետք է հասկանանք մի բան. ՀԱԿ-ի գործողությունների և մարտավարության մեջ, մեծ հաշվով, որևէ բան չի փոխվել: Ես հասկանում եմ մարդկանց մտահոգությունները և այսօր ընկերներիս հետ զրուցելիս ասում էի, որ Հայաստանի քաղաքացիներն այնքան ծանր են տանում այս իշխանության գոյության ամեն օրը, ամեն ժամը, որ ցանկանում են օր առաջ ազատվել նրանից: Բայց ես չեմ հավատում, որ ՀԱԿ-ի գործողություններին իսկապես ծանոթ մեկը կարող է իրականում հավատալ, որ ՀԱԿ-ը կարող է գնալ ինչ-որ գործարքների: Ես հասկանում եմ նաև, որ Հայաստանի քաղաքական դաշտում մարդիկ այնքան անբարոյականություն են տեսել, որ վախենում են հերթական հոգեբանական աղետից: Ես կարող եմ վստահաբար պնդել, որ նման աղետ Հայաստանի քաղաքացիներին այս անգամ չի սպառնում:

-Ինչպե՞ս եք վերաբերվում Ռոբերտ Քոչարյանի՝ ակտիվ քաղաքական դաշտ վերադառնալու խոսակցություններին:

-Նախ պետք է ասեմ, որ Քոչարյանը չի հեռացել և եթե ցանկանա էլ, չի կարող հեռանալ հանրային հետաքրքրության դաշտից, քանի որ մենք թույլ չենք տա, որ նա հեռանա: Ես հավաստիացնում եմ, որ նա շատ կցանկանա հեռանալ հրապարակային քաղաքական դաշտից, սակայն չի կարող, քանի որ նա դեռ հայաստանցիների բազմաթիվ հարցերի պատասխաններ տալու խնդիր ունի: Երբ նա այդ հարցերին կպատասխանի, այն ժամանակ էլ հանրությունը կորոշի թույլ տալ նրան հեռանալ, թե ոչ: Եթե այո` դեպի ուր:

  • Print this article!
  • E-mail this story to a friend!
  • Facebook
  • TwitThis
  • Google
  • MySpace
  • Technorati
  • LinkedIn
  • del.icio.us
  • Digg
  • StumbleUpon
  • Tumblr

ՀԱՐՑԱԶՐՈՒՅՑՆԵՐ, ՀՈԴՎԱԾՆԵՐ , , , ,


  1. ANGELA BARSEGHIAN
    Հունիս 18th, 2011 at 06:22 | #1

    1.Ինչու Ձեզ հարգելի չէ այլ քաղաքական ուժերի ծննունդը Հայաստանի քաղաքական դաշտում որպես իշխանության էվ ՀԱԿին հակառակ?? Չէ որ դա դեմոկրատյաի սկզբունքն է, իսկ դուք ցավալի կերպով նվաստացնում եք Սեֆիլիանին էվ նրանց ովքեր հեռացել էն ՀԱԿից:
    2. Ինչու ՀԱԿը պետք է միակ “հակաիշխանական” ուժը լինի Հայաստանում, չէ որ քաղաքացին իրավունք ունի չհարգելու եվ չվստահելու ԼՏՊին??
    3. Արդյոք նորից ձգտում եք ԼՏՊ ական դիկտատորյաի կամ Ղարաբաղյան զիջումների որի մասին հորդորդել է ԼՏՊն բազմիցս
    ՛4.Եթե երկխոսությունը ՀԱԿԻ էվ Իշխանության միջեվ խաղաղ կերպով նոր ընտրություններ են, էվ ոչ թէ անմիջապես կենսական օրինյաց երկրի համակարգ ի գործոն դնելը, այսինքն նոր դատարանաին սիստեմա ի գործի դնելը, երեխաներին, ծերերին, հաշմանդամներին, վաելուչ կենսաղ ապահովելը աշխատավորներին մինիմում աշխատավարձի իրավունքներ ապահովելը, մոնոպոլիաների դեմ խիստ ստուգման էվ շտրաֆների կիրառում էվ հարկաին հաշվետվության ինշխող եվ ստուգող ժողովրդաին հանձնաժողովներ ստեղծում….ենթադրում կարելի է անել, որ աթոռակռիվ է գնում ՀԱԿի էվ Իշխանության միջեվ, էվ ոչ թէ երկխոսություն երկրի օրենքները ժողովրդի կենսաղը փոխելու համար

  2. ՎԱՐԴԱՆ
    Հունիս 21st, 2011 at 17:19 | #2

    ՊԱՐՈՆԱՅՔ ՉԱՓԻՑ ԱՎԵԼԻ ԵՔ ՀԱՊԱՂՈՒՄ, ՈՐԸ ԿԱՍԿԱԾԻ ՏԵՂԻՔ Է ՏԱԼԻՍ ՄԱՐԴԿԱՆՑ, ՆՈՒՅՆԻՍԿ ՁԵՐ ԱՄԵՆԱ ԱԿՏԻՎ ԿՈՂՄՆԱԿԻՑՆԵՐԸ ՍԿՍՈՒՄ ԵՆ ՀԻԱՍԹԱՓՎԵԼ ՁԵՐ ԳՈՐԾՈՂՈՒԹՅՈՒՆՆԵՐԻՑ, ՄԻ ԹԵ ԴՈՒՔ ԵԼ ՀԵՐԴԱԿԱՆ ԿԵՂԾ ԸՆԴԻՄԱԴԻՐՆԵՐՆ ԵՔ ??? ԿՈՆԿՐԵՏ ՔԱՅԼԵՐ ՁԵՌՆԱՐԿԵՔ ՈՐՈՆՔ ԿՆՊԱՍՏԵՆ ԺՈՂՈՎՐԴԻՆ, ԱՐԴԵՆ ՀՈԳՆՈՒՄ ԵՆՔ ՁԵՐ ՉԿԱՅԱՑՎՈՂ ԵՐԿԽՈՍՈՒԹՅԱՆ ՀՈՒՅՍԵՐԻՑ

  1. No trackbacks yet.