Մեր թերթի երեկվա համարի առաջին էջում տպագրված լուսանկարը, որտեղ Ռոբերտ Քոչարյանը հեծնել էր սպանված առյուծին, կարծում եմ, կարեւոր ներդրում է հայ գրական բանահյուսության իլյուստրացիայի ասպարեզում: Այդ լուսանկարը ինձ հիշեցրեց «Քաջ Նազար» հեքիաթի այն դրվագը, որտեղ Նազարը ծառի փտած ճյուղի կոտրվելու արդյունքում ընկնում եւ հայտնվում է վագրի գավակին: Շինականները մտածում են, թե Նազարը վագր է հեծնել, եւ լեգենդներ են պատմում նրա քաջության մասին: Հրատարակիչներին խորհուրդ եմ տալիս քննարկել «Քաջ նազարի» հետագա հրատարակություններում Քոչարյանի այդ լուսանկարը օգտագործելու հարցը. կարծում եմ այն հարմար է «վագր հեծնելու» դրվագը պատկերազարդելու համար: Անկասկած, դա կմեծացնի «Քաջ Նազարի» վաճառքի ծավալները եւ որոշակի եկամուտներ կբերի հանրապետության ամենաերիտասարդ թոշակառուի ընտանիքին: Ի դեպ, վերջերս հեռուստացույցով ցուցադրում էին տիկին Բելլա Քոչարյանին: Նա մի խումբ երգիչների հետ խոսում էր ինչ-որ բարեգործական ծրագրերից, որտեղ խոսք կար հանգանակությունների մասին: Կարծում եմ` տիկին Քոչարյանի բարեգործական հանգանակությունները շատ ավելի արդյունավետ կլինեն, եթե դրանք իրագործվեն բացառապես իրենց տան պատերից ներս: Այդպիսով հնարավոր կլինի ոչ միայն առողջապահական եւ բնապահպանական, այլեւ ոմանց հոգեբանական խնդիրները լուծել:

ՀՈԴՎԱԾՆԵՐ Ավազակապետություն, կոռուպցիա, Հոգեւոր, Հումոր